"El jardín del Samuray"
Obra:EL JARDÍN DEL SAMURAY
Autor: GAIL TSUKIYAMA
Trátase dun libro
intimista, no que o protagonista, un novo chinés, se traslada a Xapón, á casa
do que era o seu avó, para descansar e recuperarse dunha tuberculose, na época
previa á Segunda Guerra Mundial. Non obstante, o feito de que os xaponeses
estean a invadir China, e de que sexa precisamente un chinés vivindo en Xapón
nesta convulsa época, pasa totalmente a un segundo plano. Se non fose por
algúns detalles concretos, a historia podería desenvolverse noutra época menos
conflitiva e apenas cambiaría.
GAIL TSUKIYAMA, Imaxe recollida en bookpatch.blogspot.com.es |
A autora, é
americana, de pai xaponés e de nai chinesa... Gail Tsukiyama nace en San
Francisco onde transcorre a súa infancia; actualmente vive en El Cerrito,
California, e dedícase a escribir a súa seguinte novela. Pola coincidencia do
protagonista, crese que o libro en certo modo é autobiográfico.
Respecto ao título,
debemos facer mención a dous aspectos fundamentais na narración; por unha banda
os xardíns, como lugares onde os espíritos se relaxan e atopan a paz; e, por
outra banda, o samurai, membros dunha elite militar cuxa característica
principal era o alto sentido da honra e a defensa dos ideais do seu pobo antepostos
aos seus propios, por iso eran os adaís e defensores da tradición. Ambos os
dous termos enmarcan e definen perfectamente a personalidade do coprotagonista, Matsu, eixo que vertebra
todas as historias.
En Kioto, onde os
xardíns non se regan porque a chuvia os abastece de auga, os xardineiros
adoitan ter asignados, entre as árbores que se esculpen, uns exemplares
determinados, de maneira que sexa unha soa persoa a que poda, modela e coida a
súa obra. "Trátase de equilibrar a paisaxe do xardín coas montañas e a
natureza do ámbito, para o que se necesita sensibilidade e tempo". A
paixón polos xardíns vívese tamén nas múltiples vilas abertas ao visitante
polos seus propietarios ou descendentes dos que se dedicaron con paciencia e
empeño a crealos. Entre elas destaca a que mandou construír en 1641 Jozan
Ishikawa, un samurái que colgou os seus dous sabres para converterse en mestre.
Polo delicioso paseo que se denomina Camiño dos Filósofos atópanse varias
destas vivendas, como Murian e Hakushasonso, esta última adquirida polo pintor
Kansetsu Hashimoto en 1913. Hashimoto dedicou 30 anos a deseñar o seu propio
xardín, para o que trouxo pedras de todos os cantos de Xapón, e no que se
advirte, ao igual que na súa pintura, a influencia chinesa.
GAIL TSUKIYAMA, Imaxe recollida en litquake.org |
En realidade, a arte
da xardinaría, como tantas manifestacións culturais de Xapón, procede da veciña
China. A fluidez dos contactos comerciais e diplomáticos entre as dúas cortes
imperiais, a partir do século VIII, facilitou esta influencia. Os primeiros
xardíns apareceron durante a capitalidade de Nara (710-794), dentro do pazo
imperial, e tiñan un deseño claramente paisaxístico, con estanques e illas de
lotos que representaban o concepto taoísta da dualidade yin-yang (noite-día).
Co traslado da capital a Kioto, a xardinaría converteuse nunha arte propia,
suxeito ás normas e influencias do devir de Xapón para converterse en bandeira
da súa civilización e nunha das súas expresións máis exquisitas. Agora que o
mundo galopa atrapado na vertixe da globalización, os xardíns xaponeses
representan máis que nunca o descanso do guerreiro.
Coas liñas
narrativas claras, sinxelas e cegadoras da mellor arte oriental, Tsukiyama
creou unha pequena e conmovedora obra mestra. Os seus vívidos personaxes e a
súa prosa cristalina así coma a exquisita beleza dos serenos ambientes que
describe supoñen unha forte emoción para os sentimentos. É un libro que fala da
soidade, de amizades improbables e de amores imposibles. Que sexan xaponeses ou
chineses é algo que pasa bastante desapercibido.
En definitiva, é un
libro que non narra grandes accións, grandes aventuras nin grandes fazañas. E
non obstante é un libro que engancha, que inquieta, que fai pensar. Todo parece
que transcorre sen grandes espaventos, cunha grande dozura e ata as cousas máis
terríbeis están descritas sen acritude nin dramatismo.A forza interior dos
personaxes coloca as situacións espantosas que se viven como mero panos de
fondo: a guerra, a masacre dos chineses polos xaponeses; a infidelidade do pai;
a frialdade da nai; as experiencias durísimas que está a vivir a irmá pequena,
o desprezo da sociedade polos enfermos, a morte e o suicidio como a
restablecemento da honra social, o papel da muller na sociedade, etc. Todo está
descrito baixo tenues e cálidas pinceladas, igual ca nun cadro relaxante onde
non hai cabida para as estridencias; todo parece estar acompañado dunha música
de fondo que axuda á reflexión interior mentres traballas no teu xardín. Todo
esperta os sentidos, a sensualidade, incluso e coidada edición, sen deixar para
nada entrever unha realidade tremendamente dolorosa de personaxes atormentados.
No hay comentarios:
Publicar un comentario